محاولات فاشلة

خمسون محاولة .. في عشية و ضحاها ..
إسدال أي الحروف على كم المشاعر أسيرة الضلوع ..
لكنها سرعان ما تنصهر و تذوب من عليها ..
لتظل عارية مهرولة بين عيناي و يداي

روزاليا

أخبارك مع الحياة ؟؟؟ .. يعني

بين مجتمع الزيف الأسود .. و مجتمع الحق الأبيض .. مجتمع ال يعني .. ما هو أصل مش شرط كل حاجة تبقى يا كده يا كده .. ال يعني مافيش أحسن منه .. هاتقولولي ليه .. ؟ هاقولكوا ماهو أصل الأسود بيتحارب .. و الأبيض برده بيتحارب .. لكن ال يعني .. يعني .. مش هاتعرفله .. ما هو أصله يعني ..

يعني اتولد يوم ما المسافة بين الكده وإللي كده كبرت .. ووسعت .. و جت ناس و فتحت عينيها في زمن لا شايفة كده شكله ايه .. و لا شايفه كده شكله ايه .. بقت يعني هي المخيمات اللي عايشها فيها الناس دول .. لغاية ما كده و كده يرجعوا تاني يقربوا لبعض .. و تبقى في الدنيا كلها الاحتمالات اتنين .. يا كده يا كده ..

و رغم كده .. في ناس مجنونة قررت تشيل عمرها على ضهرها و تمشي .. تحت شعار بحثها عن الكده أو الكده الضايعين .. و ناس في عينيها ألف كده و كده تايه .. و ناس حاسه إنه ماينفعش كل المعاني تبقى يعني .

و تيجي العيلة بعد العيلة فاهمين الدنيا يعني .. يجيبوا ولاد يعني .. بين الكبر و الصغر عمرهم يعني.. بين استيعابهم و جهلهم يعني .. يعيشوا يعني .. و ياكلوا يعني .. و يشربوا يعني .. طعم الحياة على لسانهم يعني.. أقصى خيالهم إن الدنيا جت يعني.. و إحنا برده ماشين منها يعني .. إلا من رحم ربي يعني و ده يبقى حظه جه كده .. تفتكر شاف الكده ؟؟ و داق الكده ؟ و طبّق الكده ؟؟ و يمكن علشان كده بقى كده ؟؟ ممم يعني

الأسماء مش مهمة يعني.. هايفرق وائل من هيثم من برعي ما كلهم زينا يعني .. ولاّ المشاعر .. محدش شافها و أفضلها على الإطلاق المشاعر ال يعني .. و رغم إن الكده أبقى من ال يعني إلا إن قلبي مش هايستحمل الكده كله .. ما هو أصل انا بحبها يعني و مش هاخد أكتر من كده يعني..

و إنت ما تطلبش مني أكتر من كده ..يعني ؟؟ لأن ال كده ده أنا ما أعرفوش .. ولو شوفته في الشارع ما ببصلوش .. ولو سلمت عليه مرة .. ما بفتكروش ..

و يحب أفندينا يعني .. و يتجوز يعني.. و يبقى راجل من ضهر راجل يعني.. يبني بيته على أساس يعني للأبد .. مراته تحبه حب يعني.. تجيب ولاده يعني.. بأسماء و أخلاق و تربية و تعليم و حياة يعني .. و تيجي اللحظة ال كده .. و نستغربها .. و نقول الله ؟؟ هو في كده يعني ؟؟ ما هو خلاص بقى جينا للوقت إلا مافيش احتمال غير كده .. و يروح ال يعني.. و يضيع اسمه و اسم عيلته و زمنه في صفحات التاريخ يعني.. و تيجي الذكرى بعد سنين و سنين تعدي من نفس المكان ده .. و تسأل .. احتمال كان فيه كده هنا من زمان .. ممكن نسجله .. نحكيه .. و ننقله .. تسأل الذكرى عن اسم عيلة مش فاكرة اسمها يعني ممكن تكون سابت أي حاجة يعني يردوا الناس عليها ويقولولها يعني ..

و قبل ما أمشي

الحياة علمتني إني أقوى من إني أقول على أي حاجة في الدنيا إنها يعني ..

حضور أكثر من عـــــادي ياريتا ...

سَــآتيكَ كَمَا أشَاء
مَتَى أشَاء.. كَيْفَمَـا أشَاءُ

قَدْ آتيـــكَ فَجْرًا
بَعدمـَا يُغَادرُكَ حـُلمُ أنْ آتـِي
وَيَجِـفّ هَذَيـَانُكَ
فـِي انتظـَار غُبَار خُطُواتـِي

فَــآتـِي
قَد آتيكَ غُرُوبــًا
بَعْدَ أنْ تُعِيدَ الأمـَلَ
لـِغـِمـْد المـُحــَال

فـآتـِيكَ صُورةً شـِعْريـَّة
تـَروي غُيُومَـكَ بـِالخـَيـَال
وَقَد آتـِيكَ غـُرُورًا
والحَنـَانُ في كَبدِ الحُلـُم

لأبُـُوحَ بِحـَنـِيـني
لمَطْـلَع هَـذَيـَانـِكَ الآتي

قالتها ريتا عاشتها روزاليا قام بدورها أنا و قرأتها أنت ..

أحلم لكي تحبني أكثر

أَحْلُمُ لِكَيْ أَحْيَا
أَحْيَا لِكَيْ أُحِبَّ


أُحِبُّ لِكَيْ
أَزْدَادَ إِنْسَانِيَّةً


أَزْدَادُ إِنْسَانِيَّةً
لِكَيْ تُحِبَّنِي أَكْثَر

عينــــــــاك أرض لــــــــــن تخــــون

عيناك أرضٌ لا تخونْ
عيناك إيمانٌ وشكٌ حائرٌ
عيناك نهر من جنونْ
عيناك أزمانٌ ومرٌ
ليسَ مثل الناسِ
شيئاً من سرابْ
عيناك آلهةٌ وعشاقٌ
وصبرٌ واغتراب
عيناك بيتي
عندما ضاقت بنا الدنيا
وضاق بنا العذاب

جويدة

مــــش فــــاهمة !!!

إزاي ممكن قلبي يقولي إنك بتناديني
و إنت بصوتك بتقولي ابعدي ؟؟

و إزاي ممكن أصدق كلامك و إنت بتقولي كفاية
و عينيك بتقولي إياكي تصدقي ؟؟

و آجي أقولك بحبك ماتسبنيش ..
تقولي افهمي و ما تعشيش ..
أقولك خلاص هامشي .. تقولي رايحة فين ؟ إنتي هاتبعدي ؟؟

إزاي تحرقني بكلماتك
و في نفس الوقت تطبطب عليا و تقولي ما تزعليش ؟

وأرجع تاني أمسك قلبي عن إنه ينط كل شوية بين كلامي
.. تقولي مالك .. إنتي ما تحبنيش ؟؟

و أقول مش هاظهر في ميعادي ..
ما انا بالنسباله واضح إني بقيت عادي . .

يقلق عليا ويقولي إنتي ليه ما جيتيش ؟؟

لديك عدد = 1 رسالة

ليس لكِ زمانٌ حقيقي .. خارج لهفتي
أنا زمانكِ

ليس لكِ أبعادٌ واضحة.. خارج امتداد ذراعيّ
أنا أبعادك كلها

فعل فاضح في حوار مشروع ..

عايزة أقولك حاجة .. ممكن ؟

ممكن طبعاً .. بس ليه الاستئذان و دي مش من عوايدك ؟

مش عارفة عايزة أحفز حواسك إنها تسمعني .. و عايزة آخد فرصة قبل ما أقول علشان ممكن أتراجع عند آخر دقيقة ..

لا قولي .. و انا كل حواسي يا سيدتي في حالة ترقب ..

أنا .. .......

إنتي ايه .. !!

أنا .. ممم

- حاول يعرف من عينيها .. أو من صمتها لكن ما عرفش .. أو يمكن عرف و عمل مش فاهم .. – طب خدي نفس عميق .. وقولي و انا سامعك .. إنتي ايه .. ؟؟

أنا .. ممم.. بحبك أوي ..

- في أول وهلة ضحكت عينيه و لمعت بالرضا .. و فجاة حزن أسود خيّم على المكان - ..

مالك سكت ليه ؟؟ أنا بجد بحبك أوي ..

إنتي مجنونة ..

علشان بحبك ؟؟

لا علشان ماينفعش ..

مينفعش أحبك ؟؟

مينفعش أنا .. ؟

ليه مش إنسان .. ؟

أيوة إنسان .. لكن انا صعب .. ممم ليه أنا ؟؟؟ و إنتي جميلة الجميلات .. ألف رجل غيري يتمناها منك كلمة .. يتمناها منك حروف .. يتمناها منك صمت .. يتمناها منك نظرة .. ليه أنا ؟؟

وهو قلبي بيبقى مستني أقوله حب مين .. و ما تحبش مين ؟؟

لا مش كده .. أنا مش عايزك تقولي عني إني فاقد الإحساس .. إنتي ما تتصوريش انا سعيد آد ايه بإحساسك ده .. دي قمة الروعة .. و نهاية أحلامي .. إن مخلوقة زيك رقيقة تحبني !!

يا .... ، إنت جميل أوي .. مرهف أوي .. إنسان أوي .. ، أنا متأكدة إن مافيش عين شافتك زي .. ولا قلب حسك زي .. ولا قلب وكيان احتواك زي .. انا بجد بحبك .. بحبك من جوة .. إنت ليه بتعمل معايا كده ؟؟ !!

- شعور بالمقاومة صعب .. بين عين بتتمنى الحب ده .. و بين عقل شايف إنه مينفعش –إنتي أجمل من إني أتصورك في يوم من الأيام ليا أنا بس ، و أعمق و أوسع من إنك تكوني ليااا ، صعب .. صعب بجد .. أنا عقلي أضيق من إنه يستوعب مجالك ، إنتي عاملة زي اللوحة الجميلة أوي .. و إللي بالتالي غالية أوي .. محدش يقدر على تمنها .. أقصى متعة معاها هو إن الواحد يقف أدامها و يتأملها ..

أنا مش لوحة .. أنا إنسانة .. لحم و دم و أعصاب و مشاعر .. و إللي بيتخيل إن المتعة هو الوقوف على مسافة سنين ضوئية بينه و بين الحاجة متعة .. يبقى عمره ما هيعرف يعني ايه حب .. ولا يعني ايه لقاء .. و هايفضل طول حياته عاجز ..

إنتي جريئة عني في بوحك بمشاعرك ..

و إنت حسستني إني عملت جريمة بإني قولتلك إني بحبك .. و كأني عملت فعل فاضح في حوار مشروع ..

- حاسس إنه بجد عاجز .. آد ايه برئية مشاعرها .. ياترى بجد انا عاجز !! –

أنا بحبك و مش عايزة منك حاجة .. بحبك و كفاية عندي إنك تكون سعيد و راضي و مبسوط .. بحبك و انا مش مقتنعة إنك شابفني لوحة أبعد ما يمكن عمله أدامها هو توقيع بإنك حضرت .. !! يمكن أكون جرئية من وجهة نظرك .. لكن أنا مجرد واحدة عاشت .. حست .. حبت .. فقالت .. و إنت عندك إللي يستحق إنه يتحب ..

إنتي أروع من إني أرفع عيني أدامها .. إنتي عندي أسطورة و مش هاتتكرر .. زي ما إنتي صادقة مع نفسك في مشاعرك .. انا عارف قدر نفسي و إني أقل من إني أحتفظ بأميرة في غرفتي .. أو إني أشيل عطرها في هدومي .. أنا بجد أقل .. وسام حبك ليا صدقيني أتقل من إني أحطه على صدري .. إنتي عميقة أوي .. و انا بعيد أوي .. و العلاقة الوحيدة اللي ممكن تجمعنا هو إنك تفضلي على طول مشرقة .. و أنا أفضل على طول معجب بيكي ..

رسالة ..

( وَاعْبُـدْ رَبــَّكَ حَــتَّى يَأْتِيَــكَ الْيَقِيــنُ )

رحل

رحل .. رحل و لم يخبرني بموعد رحيله ..
رحل .. و كنت أشعره قبلها
و هو يلملم أغراضه من الدنيا ..
رحل .. مودعاً كل أشيائه الصغيرة ..
آخذاً على ثلاثة و ستين ألماً شربة ماء .. آخر ماطلبه..
رحل .. وترك لي كلمة ..
ووصية ..
و عهد و وعد ..
رحل .. و سلمّني مقاليد المركب ..
و دفة الشراع ..
رحل.. وهو على ثقة بأني سأكون خير خليفة له ..
رحل.. و انا لازالت في عمر الحياة لا اتعدى الشهور ..
رحل.. و أنا لازالت احتاجه ..
رحمك الله يا والدي ..

في ذكرى وفاة بابا 7/2/2004 رسالة

أنا آدها يا بابا .. ما تخافش علياا ..

____ ياعيـــــني على الفســــــاد إللي فسد ____

الفساد .. عرّفت الناس و أهل الاختصاص إن الفساد هي الحاجة التي لا ترتضيها مجموعة من الناس سواء كانت ظاهرة أو باطنة .. و عليه فا المجموعة هي التي تحدد فساد أي فكرة أو موضوع يطرأ عليها .. طبعا بالرجوع للعديد من المراجع .. سواء كانت مراجع دينية أو فقهية أو عادات و أعراف مجتمعية أو غيرها من تلك المراجع المهمة في تأصيل موضوع جديد أو لا .. إذن فاستحسان العامة هو سبب في انتشار أو انقراض أي موضوع أو افتكاسة تبحث لها عن مكان بداخل أي مجتمع .. و موضوع الفساد ده واضح أوي في أكلات الشعوب و تنوعها .. فا مثلاً نحن الشعب المصري نرتضي أكل الفسيخ و نقيم لها الطقوس و الاحتفالات في حين إنه في الأصل سمك وصل لأقصى مرحلة من التنتن .. و رغم كده بنحبه .. نيجي بقى لأهل الخليج إللي بيحبوا أكل الضب و بيرتضوه كوجبة دسمة لايكرمون بها أهل البادية سواء الضيوف رغم شكل الضب الغير مشجع على الإطلاق للتمشية بجانبه مش أكله !!!
تعالوا بقى لمجال مختلف بنفس المفهوم لكن نفكر فيها بطريقة معكوسة .. و ده يخليني أسأل .. ايه إللي يخلي مطرب فاسد ينتشر غير و كان ناس ارتضت وجوده و شجعته ؟؟ ايه إللي يخلي فساد الذوق العام بأشكال عجيبة من الموديلات تنتشر بين الشباب و البنات تحت مسمى موضة إلا و كان فيه ناس ارتضت الفساد ده و اعتبرته جمال !!!
المضحك المبكي في الأمر .. إننا لما بنحب نناقش السبب بموضوعية بنمسك على طول في النتيجة و نفضل نحلل فيها و نفتتها و نقتلها و نقتل أهلها كلهم بحث .. في حين بمعطيات التفكير الأولى لأي إنسان مثقف هايعرف إن المشكلة نابعة في الدافع وارء السبب .. لأن الناس دي عملت بالظبط زي إللي راحت حاكمت الضب هو بيتاكل ليه !!
و لأني على يقين إني لو فضلت أمسك نقطة من نقطة بالرجوع للخلف للبحث عن سبب فساد مفهوم الفساد مش هاخلص .. و لأني مقتنعة إنها معطيات مرتبطة كلها ببعض ..

بس على فكرة .. هو إحنا لو نعرف إزاي نستخدم دماغنا مش هاقول بشكل احترافي . . لكن هاقول بشكل طبيعي .. حاجات كتير في حياتنا كنا وقفنا عندها و غيرناها ..

متضـــــــايقة

إحساسات بالفراغات الكبيرة و المسافات الكبيرة .. متضايقة .. يمكن علشان كل ما أحس إني قربت خطوة اكتشف إني ببعد في طرق تانية خطوات .. ؟؟ .. متضايقة .. يمكن علشان بفرز كل يوم خيوط من الآمال و الأحلام و الابتسامات لغاية ما حسيت إني عملت على نفسي شرنقة هايموت جواها الفراش قبل ما يجرب حلم الطيران في الواقع ؟؟ متضايقة .. ساعات كتير عيني ما بتجبش أكتر من خطوتين من خطوتي .. و وداني مش بتسمع أكتر من الأصوات الباردة إللي بتحرق ممرات وداني الملتهبة على طول .. متضايقة .. مش عارفة ايه السبب المنطقي لإنزال ستار نهاية العرض في الفصل الأول من المسرحية ؟؟ يمكن حس المخرج إن الممثل مش صادق ؟؟ متضايقة .. انا بكره إللي بيتعامل بايتكيت الذوق في صدق المشاعر .. و بكره إللي بيذوق إحساساته بكريمة و فراولة .. بكره كل امتدادات للشفايف علشان يوحيلك إنه بيبتسملك و هي مش كده ... بجد متضايقة .. يمكن علشان بشعر إننا ورا الزيف ده مجرد ألواح تلج بنتعامل ؟؟ ولا يمكن علشان الصوت مني بيخرج و يرجعلي تاني حزين .. راح و ملقااش حد يستقبله .. متضايقة .. و حاسه بوحدة سودا و انا وسط كم رهيب من الأصدقاء و المعارف و المعجبين .. مسافات و فراغات و تجويفات .. ممرات و تعريجات و زوايا .. و كلام كتير بيشغل من الهوا فراغ .. و نظرات كتير طايرة في الهوا بتتحرق مع أول طلعة شمس .. متضايقة .. و متضايقة إني متضايقة .. كنت على طول بقول لازم احافظ على همتي عالية علشان إحساساتي بالتعب ما تثورش عليااا و تعمل مظاهرة .. مم انا انهرده للأسف بواجه لوحدي أكتر من مظاهرة جوايا ..