متضـــــــايقة
إحساسات بالفراغات الكبيرة و المسافات الكبيرة .. متضايقة .. يمكن علشان كل ما أحس إني قربت خطوة اكتشف إني ببعد في طرق تانية خطوات .. ؟؟ .. متضايقة .. يمكن علشان بفرز كل يوم خيوط من الآمال و الأحلام و الابتسامات لغاية ما حسيت إني عملت على نفسي شرنقة هايموت جواها الفراش قبل ما يجرب حلم الطيران في الواقع ؟؟ متضايقة .. ساعات كتير عيني ما بتجبش أكتر من خطوتين من خطوتي .. و وداني مش بتسمع أكتر من الأصوات الباردة إللي بتحرق ممرات وداني الملتهبة على طول .. متضايقة .. مش عارفة ايه السبب المنطقي لإنزال ستار نهاية العرض في الفصل الأول من المسرحية ؟؟ يمكن حس المخرج إن الممثل مش صادق ؟؟ متضايقة .. انا بكره إللي بيتعامل بايتكيت الذوق في صدق المشاعر .. و بكره إللي بيذوق إحساساته بكريمة و فراولة .. بكره كل امتدادات للشفايف علشان يوحيلك إنه بيبتسملك و هي مش كده ... بجد متضايقة .. يمكن علشان بشعر إننا ورا الزيف ده مجرد ألواح تلج بنتعامل ؟؟ ولا يمكن علشان الصوت مني بيخرج و يرجعلي تاني حزين .. راح و ملقااش حد يستقبله .. متضايقة .. و حاسه بوحدة سودا و انا وسط كم رهيب من الأصدقاء و المعارف و المعجبين .. مسافات و فراغات و تجويفات .. ممرات و تعريجات و زوايا .. و كلام كتير بيشغل من الهوا فراغ .. و نظرات كتير طايرة في الهوا بتتحرق مع أول طلعة شمس .. متضايقة .. و متضايقة إني متضايقة .. كنت على طول بقول لازم احافظ على همتي عالية علشان إحساساتي بالتعب ما تثورش عليااا و تعمل مظاهرة .. مم انا انهرده للأسف بواجه لوحدي أكتر من مظاهرة جوايا ..
posted by rosealia29 at ١:٠٤ ص
15 Comments:
كتير قوى الواحد بيحس الإحساس ده
الناس العادية يعنى
إحنا ناس عاديين لكن إنتى
التنمية البشرية كلها وكورسات التغيير
إرمى حمولك على الله
مافيش أحن منه
ربنا يفرج كربك وكرب كل مكروب من المسلمين
ودايماً قولى
اللهم إنى أعوذ بك من الهم والحَزَن
ومن الخوف والكسل ومن غلبة الدين وقهر الرجال
يزيل الله بها همك وهم المهمومن
سلام ياقمر
إييه يا نون مالك يا حبيبتي؟؟ أينعم صوتك مكانش عاجبني وأنا بكلمك إمبارح في الشغل بس متخيلتش إنه للدرجة يمكن علشان إحنا كتيير بنعتمد عليكي إنك تخرجينا من حالات إكتئاب أو هبوط الإرادة فمش بنتخيل إنك ممكن تمري بالموقف ده زيينا.. طب بصي يا قمر إييه رأيك نروح سوا بعد الشغل يوم السبت وأخرجك الخروجة اللي كنت قايلاك عليها الخميس اللي فات في الكورس بس بشرط إني مش هتكلم أنا بس هسمعك..
شوفي كده وبلغيني واحنا في الشغل.
محبتي
يااااااااااااااااااااااااااااه
بس انت بتبالغي شوية
لاني بصراحة انا مش متضايق
انا مفرقع منهم
و اكيد مانت عارفة
ربنا معاكي بجد
و ربنا يبعد عنك الضيق
كلامي كله بيتحبس جوايا لما بعرف او بشوفك متضايقه
يمكن دي اوى تدوينه تكتبيها وانتى مضايقه واعرف ارد عليها
مع ان لرد هو لا رد
!!
أولا
روزا باين عليكى انك مضايقة من غير ما تكتبى
و هطلب منك طلب ممكن تقفى ادام المرايا و تقولى انا مش مضاقة أنا مبسوطة عشر مرات ؟
بس انتى مضايقة لانك بتفكر فى المجهول ( المستقبل ) كتير جدا و زيادة التفكير بيه فى غير الاحلام هو اللى بيحطنا فى الحالة ده
ده تصورى بس باكد انك بيبان عليكى جدا انك مضايقة
اخوكى جودة
ربنا يبدل همك وضيقك فرح وهناء بس انتي اللي كنتي بتقولي لينا دايماً ان مش لازم تكون انت صح ولازم توسع دواير فكرك علشان تشوف نفسك أصح ، يمكن لو وسعتي الدايره شويه تكتشفي انك مخبيه عن نفسك غلط لو واجهتيه اكيد هتكوني أحسن ، يمكن متخديش بنصيحتي بس لو جربتيني هتلاقيني اشطر تلميذ اجتاز الكورس بتاعك ويا عالم كلام واحد مكناش بناخد بيه كان ممكن يفرق معانا قد ايه ! ربنا يارب يفرحك ويهنيكي ويبعد عنك كل ما يسبب لك غم أو هم.
روزي
الاحساس اللي انتي فيه دة صدقيني طبيعي
وطالما حسيتي كدة يبقي مرحب بيكي في عالم الحزن والضيق
وان دل علي شئ فدة يدل علي انك انسانة
تتمرد علي الزيف والخداع اللي حوالينا
انا مش هقولك مش تضايقي
وكون انك مضايقة انك مضايقة دة ابلغ دليل علي كلامي
كل اللي هقوله انك لازم تواجهي مستقبلك وحياتك وانتي مبتسمة
صدقيني التجارب هتعودك علي دة
بس خلي بالك
اياكي تكوني بتظلمي غيرك بحكمك دة
لاني انا شخصيا لما مريت باللي انت فيه اكتشفت اني كنت فاهمة نفسي غلط وفاهمة غيري غلط
عشان كدة كنت مدايقة
فكي يا قمر
وافتكري لحظاتك الحلوة
افتكري الابتسامات والضحك
يا ستي افتكريني انا لما كنت معاكي في الحفلة
هههههههه
اضحكي ومش تشيلي هم
قولي يا هم ليا رب كبير عليك
ده كفايه عليكى كل الناس اللى بتحبك فوق دول
مش هقولك أكتر من يا بختك على حالة الضيق دى يا روزا
يا بختك لأن الضيق أشارة مرور خضراء للفرج و الأتساع
يعنى من الأخر أبشرى فسوف تفرحين
متضايقه؟؟؟؟؟؟؟؟
كلنا مثلك تماما متضايقين
صدورنا خلاص كانها امتلات رماد خلاص انفاسنا لم نعد قادري علي استخلاصها من الجو كما يجب ان يتنفس الانسان
لكل واحد اسبابه الخاصه التي تسسب له هذه الحاله لكن لا شك ان هناك سبب عام وهو حالة الضيق التي نشعر بها جميعا من نظام او بالاحري لا نظام سياسي يخنقنا و يمنعنا اهم حقوقنا و هي حق اختيار من يحكمنا و يقوم علي مصالحنا
كثيرة هي الاسباب التي تصيبنا بالياس و الاحباط و القنوط و تدفعنا الي الانتحار
كلنا متضايقين
حتي متي ؟
حتي نملك كل حقوقنا عندها لن يكون الفقر او غيره من اسباب زهقنا لاننا علي الاقل سنشعر بان بلادنا تسير سير مطمئن للامام
سنطمئن علي اولادنا و ان ما لم نحصل عليه سيحصلون هم عليه
كلامك سهل و ممتاز و معبر
لكي تحياتي
أشكر مروركم جميعاً .. و سعيدة بالمرور الأول ل
سمراء النيل
ومجروح و مبروك المدونة
و ذو النون المصري ..
و على فكرة من أسباب ضيقي إن الكل بيتخيل إن إللي بيعلم الناس أسلوب الحياة .. مش ممكن يكون في يوم من الأيام محتاج إللي يعلمه .. و إن إللي بيسمع الناس كلها .. أوقات كتير مش بيلاقي حد يسمعه .. مفارقة عجيبة مش كده ؟؟
ألف شكر لمروركم جميعاً ..
بصى انا مش حقولك من حقك تزعلى او مش من حقك تزعلى بس لو سكتى لحظه بس وفكرتى فى كل الناس الى انتى وقفتى جنبهم وبدلتى الميه واحداشر على جينهم بضحكه جميله وكلمه شكر انك فرجتى عنهم همهم وحليتى مشكلتهم مش حقولك ان ده حيخليكى تبقى احسن كتير بس حقولك ان سعادتا بلاقيها دايما فى اسعاد الاخرين يا رب مش اشوفك تانى زعلانه
ايه ده ايه ده؟
مين اللى مزعل روزا حبيبتى
بس انتى شاوريلى عليه وانا ابقلظهولك
ولا يهمك يا قمر..كلنا بتجيلنا لحظات ما بنبقاش طايقين نفسنا ولا حاجه من اللى حوالينا
بس دى بتبقى فتره مؤقته
ممكن تكون فيه حاجات كتير قوى حوالينا غلط وتجنن العفاريت
لكن ايمانك بان الخير كتير ولسه الدنيا كويسه هو اللى ممكن يرفع معنوياتك
عشان خاطرى ماتتضايقيش وماتزعليش نفسك
وماتسمعيش كلام اللى بيقولك اقفى قدام المرايه وقولى انا مبسوطه ده
مش هايبقى جنان كمان
ولا ايه؟
ودى أكبر بوسه ليك عشان ماتزعليش
مووووووووووووووووووه
ايه السبب المنطقي لإنزال ستار نهاية العرض في الفصل الأول من المسرحية ؟؟ يمكن حس المخرج إن الممثل مش صادق ؟؟ متضايقة .. انا بكره إللي بيتعامل بايتكيت الذوق في صدق المشاعر .. و بكره إللي بيذوق إحساساته بكريمة و فراولة .. بكره كل امتدادات للشفايف علشان يوحيلك إنه بيبتسملك و هي مش كده ... بجد متضايقة
الجزء ده حلو اوي بجد
وسلامتك من الضيقة .. واضح انك بجد بني ادمة رقيقة اوي
مش عارفة ليه كلامك وجعني
حسيتني فيه
وحسيت انى عارفة حكايتك
من طقطق لسلاموا عليكوا
وانى قريت مابين السطور
وحاسة كمان انه المرة دي
الضيق مختلف والوجع اكبر
قلبي معاكي
واحدة متعرفيهاش كويس
وبصراحه احساساتك لها كامل الحق في الثوره عليكي
ومواجهتك للمظاهره الي جواكي لوحدك دا باختيارك انتي
انتي عارفه ان اللي حواليكي كتير وان اللي تهميهم اكتر ومع ذلك اخترتي انك تواجهي مشاكلك لوحدك
اسالي نفسك كده كام مره اتسالتي متضايقه من ايه ورفضتي الرد???!
إرسال تعليق
<< Home