الثلاثاء، ذو القعدة ١٠، ١٤٢٨

على فين ؟


على فين .. ؟ طريق ممدود .. من يوم ميلادي لغاية الموت .. على فين ؟؟
لحظات الدنيا معايا بتقف .. و تدور الفكرة حوالين نفسي أدام الشمس ..
و تدور و تدور ..
و شرايط الذكريات و المواقف تعدي أدام عيني .. زي أفلام السينما الصامتة .. تجري .. و ما الحقش افكر
و أنسى انا بقى عندي كام سنة ؟؟ و كل الأحداث دي حصلت امتى ؟؟
..
على فين ؟؟؟
الناس شايفاني قوية .. و انا أغلب من ريشة نعامة يتيمة ...
الناس شايفاني مصدر دفا .. و انا شعاع شمس من تحت غيم مليان مطر يكفيني للدفا..
الناس شايفاني وكيل الطاقة لكل المحيطين .. و انا في أمسّ الحاجة لنظرة حب عابرة تطمني
..
على فين ؟؟
الطريق مافيهوش إشارات ؟؟ و الإشارات على حسب إللي بيعدي ..
و انا مش عارفة انا شوفت صح ؟
طب فهمت صح ؟ طب هي فعلا إشارة ؟
..
طب على فين ؟؟
انا بحب أوي .. و مش عارفة إذا كان دي ميزة ولا عيب ..
هو مين إللي بيحدد مسار النهر إللي جاي من الشلال ؟؟
قوة الماية المندفعة من فوق ؟؟
ولا اختيار الأرض ؟؟
هو ممكن العطشان يرتوي بحقن ماية عذبة تحت الجلد ؟؟
هو الحب لو مكنش كده ؟؟ يبقى اسمه برده حب ؟؟
..
على فين ؟؟
مين إللي المفروض ينتصر في النهاية ؟؟
حق العقل ؟
ولا حق القلب ؟
ولا المصلحة هي دايما سيدة المواقف و في كل العصور ؟
..
على فين ؟؟
شعور الوحدة ده حاجة صعبة أوي ..
و الأصعب منه إنك تكون وسط الناس ..
تخيل إنك تكون واقف على مسرح .. و شايف إن الحضور مستمتع جدا بكلامك المؤثر
و إنت سعيد .. و بتقول من قلبك أحسن ما عندك ..
و بعد ما خلصت ..
و نور المكان ..
اكتشفت ..
إنك تكون بتحاااضر للكراسي ..
و إنك شوفت ضهور الكراسي روؤس ناس ..
..
على فين ؟؟
هو الطريق اتجاه واحد
ولا اتجاهين ؟
هو إللي ماشي على الشمال
زي إللي ماشي على اليمين ؟
هو إللي بيتابع آثار الأقدام
زي إللي ماشي باليقين ؟
على فين ؟؟