صعب أوي
صعب أوي .. إنك تتخيل إن إللي جاي إدامك ده و مادد ايديه بالسلاام .. جايلك .. و بيبتسملك .. جاي علشانك ..
و تمد ايديك ليه .. و ترسم في عدد خطواته أحلام و أحلام .. و تقول عارفني زي ما أنا عارفاه .. و تكتب شعر .. و توصف المشية و الملامح و النظرة .. أيوة هو .. جاي علشاني .. و تحس إن الخطوات بينك و بينه سنين ..
وأول ما يقرب . . و تحس رعشة أطرافك في مجاله .. و نفضة عينيك .. و دقة قلبك المتسارعة مع كل رمشة عين .. و فراشاتك إللي بتتحرق مع حرارة الاقتراب ..
تتفاجأ ..
إن إللي كان جاي أدامك ده و ماادد ايديه بالسلاام .. جاي بشوق و حب لإنسان وراك .. مش إنت ..
مش إنت .. عارف يعني ايه مش إنت ..
هاتروح بايديك فين وقتها .. ؟ ياترى هاترجعها مكسورة في جيبك تاني ..
طب و الشعر و إللي قولته ؟؟
طب و ابتسامتك ؟؟
posted by rosealia29 at ٢:١٨ م
13 Comments:
هيتحول الشعر لذكرى مؤلمة تحفر في القلب طريقها وتترك على الملامح أثر..
عارفة الإحساس ده عامل بالظبط كأنك شايفة حد من بعيد يشبه مثلا صاحب مسافر من زمان بتتبسطي أوي وبتقولي لكل اللي حواليكي ولما بيقرب بيعدي من جنبك من غير أدنى إلتفاته لأنه مش فاكرك ولو حاولتي تفكريه بنفسك بيفتكرك بصعوبة وبيسلم عليكي بجفاء وبيمشي وتتوجعي أوب وبتحسي بخيبة أمل وتتحول فرحتك برؤيته لفراغ وألم وكسفة..
بس عارفة ده مش هيمنع إنك لما تتخيلي تاني في حد كنت تعرفيه إنك تقفي تستنيه بنفس الفرحة ونفس الترحيب لأنك لو خفتي إنك تفكريه بنفسك يمكن تخسري ضحكة من القلب واسترجاع لذكريات عندك نصها وعنده النص التاني مش هنحاسب الناس بردود أفعال غيرهم..
نونة الدنيا ماشية وبتعدي خلينا نغربلها ونجمع الفرح.
صباحك سكر... بحبك
اه صعب جدا جدا الاحساس ده
بس الاصعب انه برضه مش هيحس بيه !!تصوري لو الكلام والشوق والاحساس الي جواكي ليهم زرار
زي اي بوست ف البلوج
ويبقي ف استطاعتك تلغيهم
يا تري هدوسي ع الزرار ؟؟
معتقدش
عذابهم احلي بكتير
بلوج جميل
تسنيم جابت من الأخر , تحياتى ليكى يا تسنيم
صعب أوى .. أسم البوست ده تمام
أول حاجه هاقولها بعد موقف زى ده .. أوبس
وبعد كده هافكر شويه وقول لنفسى
1. لماذا أشتريت فراء الدب قبل صيده
2. لازم أعمل شفت + دلييت و الأحسن فورمات للجزء ده بدل ما يعمل باد سيكتور فى دماغى
3. هاعمل أيه فى الشعر
4. مين اللى قال الدنيا على جناح يمامه
5. هافتكر الكلمه اللى بتقول الحياة سلسلة من الالام المتتاليه
6. أساسا أنا مش غلطان , هو أساسا ما حسش بيا من الأول
7. المحصلة أنسى و يالا نستقبل يوم جديد قد يحمل حب حقيقى
أول حاجة جات على دماغى لما قريت البوست ده أنك بتكتبى تدوينات تنفع تتعمل لوح جميله بتعبر عن مشاعر أجمل
تحياتى ليكى يا روزاليا
صعب
صعب اوى
هيكون احساس غريب
قوى
مش عارف اقول ايه !!
و ممكن جدا الشعر ده يتحول لابتسامة تترسم على وشك لما تفتكري
و الاكيد انه هايحس جدا و هو كمان هايحس بانه ممكن يكون عرّضك للاحراج بس مش هايعرف ازاي يعالج الموقف عشان كدة هايكمل طريقه و يعمل انه ماحسش بحاجة رغم انه من جواه حاسس جدا و مش عارف يعمل حاجة
عارفه يا روزا
الابتسامه والاحلام والشعر منك انتى من جواكى محدش منحها ليكى
هو صحيح صعب اوي
لكن انا اتعلمت زي ما المبرمج قال ان اخد خطوه محسوبه
واهو موقف زي مواقف كتير بعضها محزن وبعضها مفرح
لكن المهم اننا نتعلم منها ونعرف انها حصلت علشان نعيشها واكيد نعرف منها حاجه ....
هو فعلا صعب اوى اوى اوى
بس هو درس و الانسان لو مر بيه هيعرف امته يمد ايده و امته لأ
بس فى الاخر الموقف ده بيبقى صعب جدا بس خبرات الواحد بياخدها رغم الشقاء الانسان بينسى بحاجة حلوة جديدة فى حياته
اتمنى لكى حياة سعيدة بعيدا عن تلك الصعاب
شكرا لمروركم جميعاً ..
hard situation
and harder feeling
i dunno what to say,
but if i were u, i'll pray that no one has noticed that but me and keep my wound to myself..
هو الموقف صعب يا روزا
بس لو الواحد هيقف عند كل موقف يعدى عليه يبأى الدنيا مش هتعدى
الدنيا مواقف ولازم نتعلم منها
لازم ناخد موقف ايجابى مديت ايدى ارجعها وافكر مليون مرة بعد كده قبل ما امدها تانى
ربنا يحفظك من كل شر يا روزا
معاكى حق
بتوجع
على فكره الصور و اللوح حلوه اوى
ايه الرقه اللي انتي كاتبه بيها دي
فعلا الموقف بيكون صعب
لكن له ميزة قضينا وقت جميل اوي واحنا فاهمين غلط
حقولك
وقتها حتعلم وحكتسب خبره
الشعر اللي طلع مني ده يخليني اقدر اكون شاعر بعد كده
الشعور الجارف اللي خرج مني ده يخليني اعرف طعمة واقدر اللي حاسس بيه غيري
حرجع ايدي جنبي والوم نفسي على اني مقدرتش الامور صح
وحتعلم وحتزيد خبرتي
انظري للجانب المشرق
انك كنتي بتسلمي بس ورجعت ايد واحده
غيرك بيكون رايح ياخد بالحضن وبيرجع بحضنه كله
فاهماني
إرسال تعليق
<< Home