هــــــرتلة مالهاش لــــزمة ..

شعور بالخنقة غريب .. أثناء تصفح أوراق الجرايد تعيسة الحظ على طول الخط .. أو متابعة أخبار بؤساء الشرق الأوسط في اختراع التليفزيون العجيب .. !!

و بتثيرني بالغيظ المواضيع المنسووخة من خمسين عام بتغيرات بسيطة في الحبكة الدرامية و أسماء الشخصيات – علشان محدش ياخد باله – و تبقى بعدها مش عارف احنا سنة كام انهرده !! ..

و ياسلاام في استخدام اللغة و أدواتها على غرار الباترون و التفصيل نفس شعور شخص إللي اعتاد لبس الجلباب و القعدة على المسطبة و فجأة كان مدعو على حفل بالملابس الرسمية في فندق 19 نجمة .. !!

ولو عايز أبسط طريقة ترفع بيها ضغط أي حد .. إسأله بعد مؤتمر صحفي مهم مع شخصية مهمة قالت كلام مهم نقلته محطات مهمة .. هو قال ايه مهم ؟؟ !!

ولو عايز تعرف المسافة بين تفكيرك و بين تفكير الناس المهمة دول .. قيس المسافة بين الأغنية الشهيرة و المعروفة في ربوع المعمورة لصاحبها الفذ العبقري – إللي مش عارفة اسمه – ( العنب العنب العنب) و أغنية (سألتك حبيبي) لفيروز .. شوف انت مين فيهم ..قيس وقولي طلعت المسافة كام سنة ضوئية !! ...

غريب جداً لما تكتشف إن الناس شايفة إن أطول الطرق للوصول للهدف هي أسهل الطرق و أسرعها .. و إن الصدق هبل .. و الشجاعة تهور .. و الأمانة ملهاش سوق .. و إنك وصلت منتهى الإبداع لو عرفت تظهر عكس ما تبطن .. و قمة الديوومووقراطية لو الأم ماشيـــة ملتفحة السواد و بنتها ماشية معاها ملتفحة ألوان ميلودي وروتانا و مزيكا في رسمها و شكلها و ملامحها .. !!

على فكرة ..
كان فاهم غلط إللي قال - تكلم يا هذا حتى أعرفك- ..
لأن متهيألي لو سكت هاعرفك أكتر ... !!!