مدالية في عيد ميلادي

في عيد ميلادي .. وصلتني من أعز الناس على قلبي

منتدى بورسعيد أون لاين

مدالية مفاتيح .. غاية في الروعة ..

و لأن جوسي كانت سيدة الموقف في اختيار الهدية و لأنها أقرب لطبيعتي

فا كان اختيارها للهدية لعدة أسباب زي ما حسيت ..

اختارت حاجة تكون ملازماني طول الوقت افتكرها وافتكر أقرب الناس ليا كل لما أبص لايدي..

على فكرة انا بحب جداً المعنى إللي في المدالية .. علشان الملازمة لصاحبها

و آد ايه فيها حاجات كتير لصاحبها و آد ايه بتفضل في ايديه لفترات طويلة ..

ولو ضاعت يضايق .. و طول ما هي في ايديه مرتاح بوجودها ..

اختارتها فضة .. لأن الفضة عندي معنى للتحمل و الشياكة و الصبر ..

المدالية عبارة عن وردة ( روزاليا ) رمز نعومة الورد ورقته ..

المدالية طولية أشكال مرتبطة بأشكال علاقة مرتبطة بعلاقة ..

لكن اتفاجئت .. و كانت الصدمة ..

إن المدالية بتاعت المفاتيح .. ماعنديش ليها مفاتيح ..

ماعنديش خزنة حاطة فيها متعلقاتي بمفتاح .. لأن خزنتي دماغي ..

ماعنديش درج خايفة على اللي الحاجات إللي فيه بمفتاح .. لأن كل إللي حاجات إللي خايفة عليها في قلبي ..

ماعنديش باب أنا صاحبته ... بمفتاح .. لأن أنا مش صاحبة أي حاجة في الدنيا غير نفسي ..

معنديش سر بمفتاح .. لأن كل الأسرار في عيني ..

فا مش عارفة أحط في المدالية ايه ؟؟ بس هامسكها و من غير مفاتيح ..

و هتلازم ايدي و برده من غير مفاتيح ..

آخر حاجة أقولها ..

ألف شكر لكل واحد ساهم برأيه أو بفلوسه أو بإحساسه

في المدالية دي .. أنا بحبكم جداً ..