بحبك .. و بحبها ..

لما كانوا بيطلبوا مني أرسم عن الوطن لوحة ..

مكنتش برسم غير ملامح أمي ..
و لما كانوا يسألوني حافظ نشيد ايه ؟

مكنتش أعرف غير لحن أمي ..
و كبرت و درست و عرفت إن محور الكون عينيها..
و مصدر الإشعاع ايديها ..
و كل الطرق و الشوارع آخرها برده إليها ..

فهي النموذج إللي بقيس عليه حياتي ..
يا صح انا قريب من قلبها ..
يا غلط عن بعيد عن دربها ..

و لما عرفتك ..
اكتشفت إني كنت عارفك ..
ما إنتي ملامحك من ملامحها ..
حتى إسدال صلاتك شبه طرحتها ..

ما انا كنت برسم بلون عينيك الشجر من قبل ما أشوفهم ..
و أعلم العصفورة إزاي تغرد حروف اسمك من قبل ما أعرفهم ..
و أرش من عطرك إللي هو عطرها على ورق الورد في دفتري ..

وأحس بصوتك يمسح في عروقي تعب الأيام ..
ما هو صوتها برده كان بيطبطب عليااا لما أنام ...

ولما أرجعلها بعد غياب و سفر تاخدني في حضنها ..
تمسح بايديها شعري بدمعها ..
وتقولي وحشتني ..

و انتي زيها .. لما غبت ..
حسيت دفا حضنك منّها ..
و رعشة دمعك على كفك زيها ..
وصوتك و انتي بتقوليلي وحشتني ..

عارفة .. ؟
ببقى عايز أحضن الدنيا في عينيكي ..

ملعون أي غربة تبعدني عنك ..
ليه ؟ و عشان ايه ؟؟ و بكاام ؟؟
ده كفاية حطة راسي على صدرك ..
كفاية حنية دعاكي ..

على فكرة ..
بحبك أوي ..
لأني بحبها ..