افتــــــح البـــــاب للتــــــاج

و أخيراً خرج التاج الأخير للنور .. بعد ما كان على وشك إنه يتحرق في الفرن من النسيان و الإنشغال .. رغم إني بكره عذر إني مشغولة .. لكن بجد و للأسف مشغولة .. و ده إللي خلاني انهرده أنوي آخد التاج معايا الشغل و أعمل منه جزء جزء من خلال اليوم علشان أحس إني انجزت أي حاجة تانية برة الشغل .. و بعدين مبرمج اتبع معايا كل أساليب السياسة المحنكة ... و ربط معايا كل أنواع الجأش إللي في دنيا .. فا متهيألي عيب بقى ..
نبدأ .. ؟؟

اسم مدونتك ؟
فكرني السؤال ده .. بأول سؤال بيسأله الظابط للحرامي في فتح المحضر .. س .. اسمك ؟؟ و رغم إني مش حرامي ولا حضرتك ظابط .. و ما سرقتش حاجة .. فا ماليش نفس أرد على السؤال ده .. و اكتبه عندك أي حاجة ( تروق لك ) .. حلوة تروق لك دي ؟؟

لماذا اخترته.. ماذا تقصد به ؟
مممم .. آآه ممكن ده .. اخترته ليه .. روزاليا كان اسم شخصية بنت في أول مسلسل مكسيسكي أتابعه كان عندي أيامها 17-18 سنة تقريبا .. مش فاكرة اسم المسلسل .. لكن فاكرة إن البنت دي حكاياتها كانت حكايتي بالصوت و الصورة .. و بعدين حسيته أوي .. أما بالنسبة لحواديت .. فا أنا بتكلم في كل حاجة .. و أي حاجة .. و مافيش حاجة ممكن تمنعني من إني أقول أي حاجة وقعت عليها عيني .. أو أي حاجة وصل لها دماغي .. و من هنا جاءت ( حواديت روزاليا ) ..

هل فكرت في إغلاق المدونة.. والسبب ؟
و أقفلها ليه .. محدش عايز مني حاجة .. ولو فكرت أقفلها ممكن يكون وقتها السبب إني شعرت إني لقيت مخرج تاني للتعبير عني غير الكتابة ..

صورتك فى المدونة ..رمزيتها ؟
بمناسبة الصور الأول .. انا إنسانة من النوع البصري .. يعني العين عندي بحترمها جداً .. مهم أوي إن عيني تكون مرتاحة .. حتى لو مكنش فيه سبب منطقي للراحة دي .. و برده بحترمها لو كانت مش مرتاحة حتى لو مكنش في سبب وجيه لعدم الراحة .. لأن دايماً عيني صح .. أو بمعنى أقرب إحساسي بعيني صح ..
نيجي بقى لموضوع الصورة .. الصورة دي اختارتها تكون رمز لروزاليا لأكتر من سبب .. يعني مثلاً نظرة عينيها فيها استحياء و تواضع و حب رغم إن ملامحها بتقول إنها قوية .. و ده السر .. اختارتها أبيض و أسود .. علشان مش الألوان إللي بتدي قيمة للفكرة .. الفكرة هي إللي بتلون المعاني .. يعني بستغرب أوي من أي حاجة في الدنيا الناس تعجب بيها و تبقى مشدودة ليها .. و هي مجرد ألوان صاخبة بتشد العين بفطرتها و يظن الفرد منا إنه إعجاب و دي مش حقيقة .. لأن من وجهة نظري الإعجاب الحق هو إللي يكون من بدون مجاملات ولا تكاليف ولا بهرجة زايفة هاتروح بشوية ماية .. آخر حاجة بقى .. غطاء الرأس أو الحجاب .. حسيت البنت دي محجبة رغم إن نص شعرها باين .. و كأن الحجاب جوة الأول قبل ما يبقى برة .. إللي برة ده مجرد تكملة لمعنى أساسي تم جوة و باقتناع ..

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
ولا واحدة من دول .. أنا بكتب إللي انا حاسه إني عايزة أقوله .. مش بسأل الكلام وهو طالع إنت تبع مين في علوم الكلام .. إللي يصنف كده حضرتك .. مش انا ..

لماذا تدون أصلا ؟
لأني كائن حي . . يأكل و يشرب و يتنفس و يدوّن .. و زي ما التنفس مطلب أساسي للحياة .. التدوين مطلب أساسي للحياة .. فا طوول ما في الرئة هوااا ... في القلم حبر .. في الجو أفكار كتير محتاجة تتسجل ..

أحلى جملة قيلت لك فى وصف مدونتك ؟
حااجات كتير – من فضل الله – اتقالتلي عن المدونة .. لكن كان أغلبهم عن إن مدونتي كلها على بعضها مدونة مريحة للأعصاب سواء كان الصور أو الألوان أو الكلام .. و ده و إن كان متعمد بعض الشيء إن يكون كل حاجة بقولها في كل بوست بتقول إللي انا عايزة أقوله .. سواء اللون أو الصورة أو الجو العام ... الموضوع ده جزء كبير من تكويني .. لازم أكون مرتاحة و أوصلك الإحساس إللي عندي بكل الطرق .. و الحمد لله وصل لناس كتير .. في كمان وصف جميل و بعتز بيه من مبرمج لما قال عني ( روزاليا ملكة الإحساس الأزلى ) بجد شهادة بعتز بيها ..

التعليقات بالنسبة لك ..أهميتها ؟
أهميتها متوقفة على نوع و دماغ و تكوين الشخص إللي هايعلق – ده في حالة إني عارفة مسبقاً مين إللي هايعلق - ، و أحيانا يحصل العكس .. أكتشف تعليق يكشفلي عن شخصية تستحق الاهتمام .. وممكن أكتب بوست بكامله بس علشان الدماغ دي تعلق .. لأن التعليق عندي على نفس القدر من أهمية البوست ..

أحلى بوست كتبته ..ضع اللينك ..ثم اذكر لماذا ؟
كل بوست كتبته ( أنا ) و انا بحب ( أنا ) في كل بوست .. عايز تعرف مين أنا .. اتفضل اتصفح المدونة كلها ..

أفضل مدونة قرأتها ..يمكن اختيار عدة مدونات ؟
كل مدونة عند صاحبها افضل مدونة .. لأن في كل مدونة ذكرياته و آلامه و آماله و أحلامه و سخرياته .. كل بوست حالة .. صعب أوي افضل في عالم التدوين حالة عن حالة .. لأن لكل حالة ظروف .. و بالتالي مجال التفضيل في الوضع ده صعب .

أفضل بوست قرأته ..يمكن اختيار اكتر من لينك ؟
هو أنا كنت بتكلم هندي في ردي على السؤال إللي قبله ؟؟؟ هو يعني المدونة إللي هاتعجبني هاتبقى حاجة ... وبوست عجبني من مدونة تانية .. هايبقى حاجة تاااااانية ؟؟؟؟؟ ماهو البوست الصائب أكيد هايبقى من مدونة صائبة .. ( مش بحب اللف و الدوران .. ماشي ؟؟ )

هل خسرت صديق بسبب كتابة هنا ؟
هو مش خسرت بالمعنى الصريح ليها .. لكن اتفهمت غلط .. ااممم أو مش برده اتفهمت غلط .. لكن كلامي هنا لمس كتير قرووه .. لمس أوي .. و شعروا في بوستات كتير إنه ليهم .. أو عنهم .. يمكن صدق الإحساس وصل .. و زي ما كنت قولت قبل كده ( إن الإحساس الصادق بيوصل أسرع من الحروف في ترجمة الإحساس ده ) و ده إللي بيحصل معايا هنا .. إحساسي بالأمور بيوصل أوي .. و بيتحس أوي .. و بيلمس أوي .. و ده متهيألي سلاح أوي و ذو حدين .. فا ربنا يستر .. علشان بجد مش عايزة أخسر حد ..

حد قل ادبه فى التعليق ..ايه رد فعلك ؟
هههههه مش هاقول بقلة أدب .. لأني مش عارفة مقدار الأدب عند فلان ده كان آد ايه علشان أعرف ده كده بقى قليل .. ولا ده بس إللي يعرفه عن الأدب .. هههه المهم .. في أول تاج ليا عن خمس حاجات محدش عرفهم قبل كده .. كنت كتبت قصتي مع البن المزور إللي عملته .. فا واحد رد عليااا و قالي – فيما معناه – أو الكلمة إللي اندهشتلها .. إن الست الغلبانة ما عرفتش فعلتك الدنيئة !!! لكن كان أسلم حل و أجمل رد على فعلتي الدنئية هو إني ما أردش .. أو تقريبا شكرته على ذوقه ..

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا ؟
ما أنا زي ما كنت قولت قبل كده المدونة بتنضح بشخصية صاحبها ، أسوء مدونة يعني أسوء شخص .. و انا ما أنفعش أقيّم شخص بين أسوء أو أحسن .. لكن انا بتعب من المدونة الصريحة أوي و الفاضحة أوي .. في كل حاجة و أي حاجة لأن ما ينفعش أتكلم عن أي حاجة بشكل واضح أوي .. لأن الواضح أوي ده لازم هايبقى فيه غلط .. يا غلط في رؤيتي لأن مهما أوتيت من علم مش هاعرف الواضح ده بنسبة 100% .. يا غلط في إللي بقوله و حاجات تانية كتير مني واقعة .. و بالتالي الصورة مش واضحة ..

أسوأ بوست ؟
يا دي الهبل ... !!!

أسوأ مدون ..مهو هتجاوب هتجاوب ؟
يارب اغفر لهم و ارحمهم إنهم لا يعلمون .. لا يعلمووون ...

أنا مش هامرر التاج لحد علشاااان عايزة أوقف حملات الأذى لغاية عندي ..